Nagbigay ng malinaw na opinyon si Pasig City Mayor Vico Sotto kaugnay ng ilang personalidad at kaanak ng mga politiko na tila ipinagmamalaki ang kanilang marangyang pamumuhay sa social media. Ayon sa alkalde, wala naman aniyang masama sa pagiging mayaman, ngunit nagiging sensitibong usapin ito lalo na kung ang yaman ay may kaugnayan sa mga kontrata o proyektong hawak ng gobyerno. 

Sa isang eksklusibong panayam ng ABS-CBN News, inilahad ni Sotto: “Ang hirap ano kasi, wala namang masamang maging mayaman kung galing ’yan sa maayos na paraan, kung pinaghirapan ’yan, wala namang masama. Of course, as public officials we have the code of ethics […].”

Subalit binigyang-diin niya na nagiging isyu ang bagay na ito kapag ang ipinagmamalaking lifestyle sa social media ay nagmumula sa mga taong malinaw na konektado sa mga kontratista ng gobyerno. “Pero siguro ’yong nakita talaga nating connected sa kontraktor, sila naman nag-post no’n online, ’di ba? So bigyan natin sila ng atensyon kung gusto nila,” dagdag pa ni Sotto.

Matatandaang simula nang lumutang ang mga kontrobersya hinggil sa flood control projects, maraming pangalan ng social media influencers, vlogger, at iba pang personalidad ang nadawit. Karamihan sa kanila ay kilalang nagpo-post ng mga larawan at video ng kanilang mamahaling bakasyon, branded na gamit, mamahaling sasakyan, at party sa mga yate. Ngunit kalaunan, lumabas na sila ay may kaugnayan umano sa mga politiko o kontraktor na sangkot sa sinasabing maanomalyang proyekto.

Kung dati ay tinatanggap at hinahangaan ng publiko ang ganitong uri ng lifestyle content, ngayon ay nagiging dahilan na ito ng pagdududa. Ayon kay Sotto, nagbago na ang pananaw ng tao. “I guess everything that’s happening now [is] for the better. Napapaisip na tayo ngayon. Kapag may nakita na tayo na ipinagmamalaki ’yong travels, luxury cars, nasa yate nagpaparty… Ngayon, napapaisip tayo. Napapaisip na tayo,” ani ng alkalde.

Dagdag pa niya, marami naman siyang personal na kakilala na mayayaman at matagumpay sa negosyo, ngunit hindi umano ito nagyayabang ng kanilang yaman sa publiko. Para kay Sotto, may malaking kaibahan sa pagitan ng mga negosyanteng talagang pinaghirapan ang kanilang tagumpay at sa mga taong biglang nagkaroon ng karangyaan nang walang malinaw na pinagmulan.

Bilang pagbibigay-diin, binanggit pa ng alkalde ang kasabihang noon ay madalas ikuwento ang mga success story na “from rags to riches.” Ngunit sa kasalukuyan, ang usapan na raw ay nauuwi sa birong, “from robs to riches,” bagay na nakakalungkot dahil nagpapakita ito ng kawalan ng tiwala ng publiko sa ilang opisyal at kanilang mga kaanak.

Para kay Mayor Vico, mahalaga ang pananagutan at transparency sa mga ganitong pagkakataon. Aniya, kung nais talagang magpakitang-gilas ang mga taong konektado sa gobyerno, mas mainam na ito ay sa pamamagitan ng pagpapakita ng matinong serbisyo at hindi ng pagmamayabang sa social media.

Sa ngayon, patuloy pa ring usap-usapan ang nasabing flood control controversy at maraming netizens ang nagpapahayag ng pagkadismaya. Ang pahayag ni Sotto ay nagsilbing paalala na ang pananagutan ng mga nasa puwesto at maging ng kanilang mga kaanak ay hindi basta natatapos sa loob ng opisina—dapat ay nakikita rin ito sa kanilang pamumuhay at asal sa publiko.