Ayaw tantanan si Heart Evangelista ng mga netizen na galit sa korapsyon dahil sinisilip ngayon ang kaliit-liitang detalye ng luxury item ng Pinay fashion icon para iugnay sa asawa nitong si Sen. Chiz Escudero na nasasangkot sa flood control anomaly at sa kontrobersiya sa loob ng DPWH.
Binalikan ng ilang netizen ang regalong singsing kay Heart ni Escudero na nagkakahalaga sa diumano’y higit sa 1 million US dollars o tinatayang hindi baba sa P56 million.
Pinoste ito ni @jmsbarretto sa kanyang X media kasama ang breakdown ng kinikita ni Sen. Chiz bilang public official kada taon at ang kabuuang kita nito sa loob ng 19 years.
Lumalabas sa post na 1,080,000 o P1.080 million kada taon ang suweldo ni Sen. Chiz simula noong 2007.
Sa loob ng19 taon, P38,756,016 ang kabuuang kita ng nasabing public servant.
Paglalatag ito ng netizen bilang sagot sa nag-viral na pahayag ni Heart sa dahilan kung bakit hindi siya sumama sa rally nitong nakaraang linggo, sa takot na baka mahubaran siya ng mga nagpoprotesta.
Sabi nga ng netizen sa kanyang post, “Kasi isa ka sa reason kung bakit may trillion peso march @heart021485 Salary Grade 31 lang ang asawa mo pero he can fund your lavish lifestyle. Paano naaafford ng isang chiz escudero ang ring na mas mahal pa sa total earnings as senator over 19 years. Pakisagot, please.”
Ilang beses nang sinasabi ni Heart na lahat ng meron siyang karangyaan ay mula sa kanyang trabaho bilang aktres mula nang magsimula siya.
Ang mga luxury brands na nakabalandra sa socmed ay regalo mula sa mga dinaluhan nitong mga event abroad. (Rey Pumaloy)
